Еврокомесарот за соседска политика и проширување, Јоханес Хан, смета дека не се потребни предвремени парламентарни избори во Македонија и се надева на промена на името, оценувајќи дека сега има „прозорец на можности“ и да се направи обид да се обезбеди двотретинско мнозинство во Собранието за спроведување на Договорот со Грција.
Во изјава за австрискиот весник, Хан вели дека оваа порака веќе му ја пренел на македонскиот премиер Зоран Заев. Тој „силно му советувал“ на шефот на македонската влада по неуспешниот референдим за името изминатиот викенд, пишува Kurier.at.
„Новите избори ќе бидат само одоговлекување на патот кон почеток на преговорите за пристапување на ПЈРМ во ЕУ, што е планирано за летото наредната година“, вели Хан.
Во врска со референдумот, Хан истакнува дека не може да се каже оти бил неуспешен.
„Невообичаено е на референдум да се добие поддршка од 94 проценти, но да излезат само 36,8 отсто од гласачите, и тоа бидејќи опозицијата очигледно беше успешна во бојкотирањето’, истакнува еврокомесарот.
Хан смета дека во парламентот може да се обезбеди двотретинско мнозинство.
„Потребни се осум или девет гласови од опозицијата и тоа мора да биде остварено. Сите велат дека сакаат членство во ЕУ и НАТО вклучувајќи ја и опозицијата, а тогаш едноставно мора да ја платите цената на ова решение. Станува збор за решение кое е во интерес на земјата, а не на партиите и политичарите. И во таков случај како можат да се обезбедат гласовите? Јас верувам со комбинација меѓу балканското и рационалното“, истакнува евокомесарот Јоханес Хан без да појасни што подразбира под тоа.
