Советникот за нацонална безбедност на израелскиот премиер Бенјамин Нетанјаху, Тачи Ханегби, во колумна на арапски јазик, објавена во саудискиот сајт „Елаф“, соопшти дека Тел Авив е подготвен да дозволи Палестинската управа да ја преземе власта во Газа, но само по завршувањето на војната.
Ханегби најпрво ја истакна потребата да се отфрлат „лагите и лажните вести“ што им се даваат на арапските граѓани ширум светот, „одново и одново“, велејќи: „И доколку го одведовме секој од вас да види со свои очи што направи Хамас во Газа, многумина од вас сè уште би верувале дека „ционистичкиот непријател“ лаже“.
Високиот функционер ги посочи напорите на Израел да избегне цивилни жртви и да овозможи хуманитарни помош на населението во Газа, „За разлика од Хамас, кој помина многу години градејќи тунели наместо засолништа за своите граѓани, па дури и ја презеде одговорноста од Обединетите нации за судбината на цивилите во Газа“.
„Стотици милиони долари стигнаа до Газа, но не и до луѓето кои имаа потреба од таа помош. Наместо тоа, тие инвестираа во индустријата на тероризмот и смртта“, објасни Ханегби, ветувајќи: „Ние сме посветени не само да ги ослободиме граѓаните на Израел од стравот и тероризмот, туку и да им обезбедиме на Палестинци во Газа да гледаат кон иднината со голема надеж“.
Советникот за национална безбедност во колумната, исто така, вели дека Израел е посветен на обновата на Газа, заедно со Палестинците, меѓународната заедница и приватните бизниси, опишувајќи ја воената кампања за соборување на Хамас со тоа дека Израел го ослободува Појасот Газа од владеењето на оваа група.
„Покрај обезбедувањето на безбедноста на нашите граѓани, што ние нема да ја компромитираме, Израел нема интерес да ги контролира цивилните работи во Газа и ќе треба да има умерено палестинско раководно тело кое ќе ужива широка поддршка и легитимитет.
Не е наше да одлучиме кој ќе биде“, пишува Ханегби.
Ханегби забележува притисок од меѓународната заедница Палестинската управа (ПА) да ги преземе работите во свои раце во Газа, но додава дека тоа би било невозможно без реформи, особено да се стави крај на поттикнувањето насилство против Израел.
„Во сегашната форма ПА тоа го смета за тешко изводливо и ќе бара многу работа и помош од меѓународната заедница и од регионалните соседи. Подготвени сме за овој напор“, додава тој.
Колумната означува нагло отстапување од публикуваното одбивање на премиерот Бенјамин Нетанјаху да го разгледа владеењето на ПА како опција за повоена Газа, тврдејќи дека ПА и Хамас се во голема мера исти.
