Хелсиншкиот комитет предупредува на физички напади врз лекарите и да не се охрабруваат навредувачите

Хелсиншкиот комитет за човекови права со загриженост реагира на изјавите и пораките упатени на вчерашните протести против вакцинацијата и мерките за заштита од ширење на коронавирусот. Комитетот предупреди на опасноста од евентуални физички напади врз лекарите кои можат да бидат иницирани од навредите и омаловажувањата упатени кон лекарите од протестот.

Во соопштението Комитетот вели дека  секогаш го поддржува правото на протест и слободно изразување на мислењето.

„Но истовремено, секогаш треба да биде присутна свеста дека граѓаните, покрај уставно гарантираните права, имаат и уставно регулирани должности. Во таа насока, потсетуваме на членот 39  од Уставот на Р.С Македонија, според кој граѓанинот има право и должност да го чува и унапредува сопственото здравје, но и здравјето на другите. Токму затоа, забраните во случај на одбивање на вакцинацијата, во ниту еден момент не може да се подведат под сомнение дека би биле основ за дискриминација или во спротивност со Уставот и основните човекови слободи и права“, се вели во соопштението.

Хелсиншкиот комитет иако смета дека рестриктивните мерки против пандемијата од ковид-19 го ограничи правото на движење и задира и во други човекови права, сепак смета  дека се оправдани бидејќи пандемијата може да се стави под контрола само преку висока стапка на имунизација и со почитување на здравствените протоколи.

„Апелираме на повисока граѓанска свест и одговорност кон овие прашања. За жал, како што можевме да видиме и на вчерашните протести во неколку градови низ државата, паралелната пандемија на лажни вести и дезинформации претставува голема опасност која го минира справувањето со најголемата здравствена криза на нашето време. Апелираме до граѓаните да се информираат од релевантни извори, засновани на научни сознанија и препораки и да ги отфрлат информациите базирани на лаги и теории на заговор. Истовремено, ги повикуваме сите општествени чинители присутни во јавниот живот, да бидат свесни за потребата од одговорен и рационален пристап во борбата со пандемијата и да не ги охрабруваат ваквите наративи, кои не само што се на штета на јавното здравје, туку водат и до понатамошна општествена поларизација, што е особено опасно при криза од вакви размери“ се вели во соопштението.

Комитетот ги осуди и навредите и омаловажувањата кон лекарите и  предупреди на опасноста од евентуални физички напади иницирани од ваквиот однос.

„Уште од почетокот на пандемијата, здравствените работници се на првата линија на борбата, и без оглед на личните ризици со кои се соочувааат, доследно и професионално ја извршуваат својата работа и спасуваат човечки животи“, се вели на крајот од соопштението.