Израелската војска изврши напади во текот на ноќта врз, како што рече, стотици цели во јужен Либан, додека Хезболах ги започна своите најдлабоки ракетни напади врз Израел од почетокот на војната во Газа, поттикнувајќи стравувања од поширок конфликт.
Израелските одбранбени сили (ИДФ) во саботата навечер соопштија дека извршиле два брана напади, од кои едниот на околу 290 цели, а другиот 110 локации, низ јужен Либан, додека сирените кои предупредуваат за ракетни напади на Хезболах се огласија во десетици градови низ северен Израел. .
Се верува дека околу 10 ракети прелетале од Либан, а повеќето од нив биле пресретнати, соопшти ИДФ. Израелската итна медицинска помош извести дека еден маж е полесно повреден од шрапнел од проектил кој бил пресретнат во село во Долна Галилеја.
Хезболах на својот канал на Телеграм во неделата рано наутро објави дека го гаѓал аеродромот Рамат Дејвид во близина на Хаифа со десетици проектили како одговор на, како што рече, „повторените израелски напади врз Либан“.
Аеродромот е најдалечната цел што либанската група ја погоди во Израел од почетокот на борбите во октомври, на околу 50 километри од либанско-израелската граница.
Израелскиот министер за одбрана Јоав Галант одржа говор на аеродромот Рамат Дејвид во средата, велејќи им на персоналот на воздухопловните сили дека израелската војна со Хезболах достигна „нова фаза“.
Во јули, Хезболах објави снимка од беспилотно летало над градот Хаифа на која се покажува аеродромот Рамат Дејвид, како дел од речиси 10-минутното видео кое ја нагласува воената инфраструктура во густо населениот град во северен Израел.
Околу 85 ракети истрела Хезболах од Либан кон северен Израел утринава, соопшти ИДФ. Војската вели дека некои од ракетите биле пресретнати, додека други паднале во Кирјат Биалик, во близина на Хаифа, и Морешет, заедница во Долна Галилеја.
Во ракетен напад во Кирјат Биалик беа повредени три лица и причинета штета. Хезболах тврди дека цел бил објект на компанијата за одбрана Рафаел во областа Хаифа.
Ракета лансирана во нападот на Хезболах утринава врз северен Израел погоди куќа во заедницата Морешет.
Во саботата, Израел го затвори својот северен воздушен простор додека чекаше одмазда од Хезболах за убиството на Ибрахим Акил, ветеран командант на елитната единица Радван.
Три деца и седум жени се меѓу 37-те лица убиени во израелскиот напад врз Бејрут во петокот, чија цел беше шефот на Хезболах во густо населена населба, соопштија либанските власти.
Официјални претставници на САД и ОН предупредија на понатамошна ескалација, при што авиокомпаниите, вклучително и Ер Франс, Туркиш ерлајнс и Егеан, ги откажаа летовите за Бејрут, како одраз на стравувањата дека бурната недела го турна регионот поблиску до целосна војна.
Израел не ја забави видно својата војна во Газа за да се фокусира на северот. Во саботата, неговите сили бомбардираа училиште кое беше претворено во засолниште, при што загинаа најмалку 22, а беа повредени 30 други, главно жени и деца, соопшти Министерството за здравство на Газа. Израелската војска соопшти дека целта била база на Хамас во училиштето, без да наведе детали или докази.
