Американскиот амбасадор во Србија Кристофер Хил денеска изјави дека насилството и вандализмот врз државните институции немаат место во едно демократско општество и додаде дека легитимноста на демократските процеси зависи од транспарентноста и подготвеноста на сите да ја почитуваат волјата на народот.
„Во часовите и деновите што следат, лидерите на Србија и нејзините граѓани треба да запомнат: Легитимноста на демократските процеси зависи од транспарентноста и подготвеноста на сите страни, без разлика дали се победници или губитници, да ја почитуваат волјата на народот изразена на изборите“, напиша Хил на социјалната мрежа X.
Тој додаде дека работата на српските изборни институции останува од клучна важност, „дури и кога Србија работи со ОБСЕ и другите за да ги реши недостатоците во нејзините демократски процеси“.
„Претставките треба да се поднесуваат преку легални, мирни и ненасилни средства“, рече американскиот дипломат.
Хил нагласи дека полицијата го одржува јавниот ред и мир и мора да направи сѐ за да ги заштити достоинството и правата на граѓаните.
„Убеден сум дека Србија ќе помине низ овие предизвици со зајакната демократија. Сите граѓани на Србија имаат право да бидат слушнати и одговорно да ги изразат своите политички ставови на мирен начин и без прибегнување кон насилство“, заклучи американскиот амбасадор во Белград.