Го поздравувам Договорот за пријателство, добрососедство и соработка со Република Македонија. Тој е важен за народите на Република Бугарија и на Република Македонија, но и за целиот регион, изјави заменик помошникот на државниот секретар на САД за Европа и Азија, Хојт Брајан Ји на средба со бугарската вицепремиерка и министерка за надворешни работи Екатерина Захариева.
Според соопштението на бугарското МНР, двајцата разговарале во Словенија во рамки на стратешкиот Форум во Блед.
– Едно од најголемите придобивки на тој договор е дека е изработен без странска помош, со што покажавме дека прашањата ги решаваме без посредници, истакна Захариева.
Ји изразил надеж дека „договорот ќе овозможи одлична атмосфера, во која Република Македонија ќе ги подобри односите и со другите соседи“.
Захариева и Ји разговарале и за актуелната политичка ситуација во регионот и иницијативите на Бугарија во надворешната политика.