Иако актуелниот хрватски претседател Зоран Милановиќ беше многу блиску до победа во првиот круг, Хрватска сепак ја чека вториот круг од претседателските избори, за две седмици, в недела на 12-ти јануари.
Иако излезните анкети спроведени меѓу гласачите по излегувањето од избирачкото место му дадоа на Милановиќ 51,48 и 50,73 отсто од гласовите, со што се предвидуваше дека тој ќе го добие новиот претседателски мандат веќе во првиот круг, се покажа дека тие го прецениле неговиот резултат за околу два отсто, па на крајот сепак ќе има втор круг.
Според привремените резултати на Државната изборна комисија (DIP), актуелниот претседател и кандидат на SDP и колаициските партнери Зоран Милановиќ освоиле 49,11 отсто од гласовите.
Неговиот главен противкандидат Драган Приморац, од владејачката HDZ и партнерите, освои 19,36 отсто од гласовите, па со него ќе се соочи во вториот круг. Од останатите шест кандидати, сите имаа помалку од 10 отсто од гласовите.
Во исто време, разликата од околу 30 отсто меѓу двајцата кандидати кои влегуваат во вториот круг е најголема во историјата на Хрватска.
Исто така, Милановиќ сега освои 792.106 гласови во првиот круг, што е далеку повеќе од бројот на гласови со кои влезе во вториот круг во 2019 година – 562.783.
Милановиќ притоа победил во сите хрватски жупании, а најмногу гласови добил во Истра, Меѓумурје и Вараждин, додека Приморац, победил само во странство.
Последните резултати покажуваат дека Милановиќ има најмногу гласови дури и во окрузите кои важат за тврди упоришта на HDZ и на десницата, како што е Личко-Сењската. Речиси 40 отсто од оние што излегле на гласање гласале за Милановиќ во таа жупанија, а 35,11 отсто за Приморац.
За претседателската функција досега во современата хрватска држава се реизбрани само Туѓман и Месиќ, а Туѓман е единствениот кој досега успеал да победи во првиот круг.
Од 1992 година, кога се одржаа првите непосредни претседателски избори, за претседател на Хрватска беа избрани Фрањо Туѓман (1992 и 1997), Стипе Месиќ (2000 и 2005), Иво Јосиповиќ (2009), Колинда Грабар Китаровиќ (2014) и Зоран Миланововиќ (2019 година).
Туѓман всушност беше трипати избран за претседател: првиот пат како претседател на Претседателството на тогашната СР Хрватска во Саборот по победата на HDZ на првите повеќепартиски избори во 1990 година, а потоа уште двапати на непосредни избори, во 1992 и 1997. Двата пати победи во првиот круг.
Во 1992 година, во првиот круг, Туѓман ги победи Дражен Будиша, Савка Дабчевиќ-Кучар, Доброслав Парага, Силвија Деген, Марко Веселица, Иван Цезар и Антун Вујиќ со 56,73 отсто од освоените гласови. На следните избори во 1997 година, Туѓман обезбеди втор мандат во првиот круг со 61,41 отсто од гласовите, со што ги победи Здравко Томац и Владимир Готовац.
Вториот хрватски претседател Месиќ го доби првиот мандат во 2000 година кога во вториот круг го победи Дражен Будиша, а во 2005 година победи на реизбор кога во вториот круг ја победи Јадранка Косор.
Иво Јосиповиќ стана следен претседател во 2009 година, кога во втората изборна рунда го победи Милан Бандиќ, подоцна градоначалник на Загреб.
Јосиповиќ беше првиот што не доби нов мандат во 2014 година, откако во вториот круг беше поразен од Колинда Грабар-Китаровиќ, која со тоа стана првата хрватска претседателка. Ниту таа не доби нов мандат, бидејќи во 2020 година во вториот круг ја победи Милановиќ, кој сега ја чека уште една борба во вториот круг.
Хрватскиот претседател се избира по мнозински изборен систем, во првиот круг треба да добие надполовично мнозинство гласови од сите гласачи кои гласале. Доколку тоа не се случи, двајцата кандидати со најмногу гласови одат во втор круг кој ќе се одржи за 14 дена, во овој случај на 12-ти јануари 2025 година. Неговиот мандат трае пет години и на оваа функција може да биде избран најмногу двапати.
