Хрватскиот пратеник во Европскиот парламент Карло Реслер (од пратеничката група на HDZ/EPP) во четвртокот е избран за шеф на парламентарната делегација за односи на Европската унија со Македонија, соопштија кабинтетот на пратеникот.
Како тело формирано врз основа на Спогодбата за стабилизација и асоцијација со Македонија, Делегацијата има клучна улога во обликувањето на односот меѓу Европскиот парламент и македонското Собрание.
Делегацијата ќе има посебен фокус на помагање на земјата да се приближи до Европската унија, а Реслер ќе биде копретседавач со мешовитиот парламентарен комитет. За потпретседатели на Делегацијата се избрани хрватската европратеничка од социјалистите и демократите Билјана Борзан (S&D) и бугарскиот европратеик од либералите Ивајло Валчев (ECR).
„Северна Македонија ја покажа својата силна посветеност на европскиот пат и покрај сите политички предизвици со кои се соочува. Нашата цел е активно да придонесеме во напорите на Северна Македонија во зајакнувањето на нејзините институционални капацитети и подготовката за полноправно членство во Европската Унија. Ова вклучува систематско продлабочување на постоечките економски, научни и инфраструктурни врски со земјите-членки. Во време на сè поизразени геополитички турбуленции, ваквата сеопфатна соработка, европскиот ангажман и безбедноста на Југоисточна Европа ќе бидат поважни од кога било“, нагласи претставникот Реслер, се вели во соопштението.
Македонија е кандидат за европско членство од 2005 година. Нејзиниот европски пат е обележан со заладени односи со соседите и политички ќор-сокак, поради што чекаше подолго од која било друга земја за почеток на преговорите. Поранешната југословенска република е членка на НАТО, а Европската унија е нејзиниот клучен трговски партнер, кој опфаќа повеќе од 75% од извозот на земјата и над 50% од нејзиниот увоз.
