Цените на основните намирници се зголемени двојно, плата од 20.000 денари денес, е како плата од 10.000 денари лани. Ова не е само политичка констатација, ова го кажуваат цените на рафтовите. И за ова не се виновни само некои трговци како што тоа сакаат да го прикажат Ковачевски и Битиќи, туку и самите тие, кои се 5 години на власт – вели портпаролката на ВМРО-ДПМНЕ, Матија Митева.
– Пред една година литро масло се купуваше по цена од 60 денари, сега истото тоа масло од ист произведувач чини над 160 денари. Килограм шеќер пред една година чинеше 35 денари, сега чини над 60 денари, ист е и случајот со брашното и млекото. Еден леб пред една година чинеше 20-тина денари, сега истиот се продава и до 60 денари – вели Митева.
Таа додава дека изнесените цени се однесуваат на основните животни намирници и буквално сите бележат 100% зголемување.
– Ова е реалната инфлација, која е речеси 100%. Основните намирници кои се неопходни за прехранување на едно семејство се со двојно повисоки цени сега, за разлика од пред една година. И зошто е виновна власта? Затоа што Македонија во 2016 година имала доволно произведено пченица за задоволување на домашните потреби, а сега нема, и увезува над 60.000 тони годишно. Тоа влијае на цената на брашното, лебот и белите пецива. Како што има пад во производството на пченица, така има и пад на произведената сточна храна, што пак влијае на поскап увоз и по неконкретно домашно сточарство, тоа е поскапо млеко, месо и јајца – вели портпаролката.
