Цените на нафтата се задржаа над 85 долари на меѓународните пазари во четвртокот, бидејќи подзапирањето на американската инфлација ги поттикна шпекулациите меѓу трговците дека централната банка ќе биде принудена да ги намали трошоците за задолжување, поттикнувајќи ја економската активност и побарувачката на енергија.
На лондонскиот пазар цената на барелот во попладневното тргување беше за 27 центи повисока отколку на затворањето на тргувањето вчера и изнесуваше 85,35 долари. Речиси за исто толку поскапе и цената на барелот на американскиот пазар каде се тргуваше по 82,39 долари.
Пазарите во четвртокот се фокусираа на податоците за инфлацијата во САД. Во јуни, цените паднале на месечна основа првпат од почетокот на пандемијата во март 2020 година. Во однос на ланскиот јуни, пораснале најслабо во изминатата година, покажуваат податоците на Министерството за труд.
Падот на цените од месец во месец ги поддржува шпекулациите на трговците за промена на насоката, што би можело да ја принуди централната банка да ги намали каматните стапки. Пониските трошоци за задолжување би ја стимулирале економската активност и побарувачката за енергетски производи.
Дури и претседателот на Fed, Џером Пауел, признава дека ценовните притисоци се намалуваат во последно време, но претходно седмицава во извештајот до Конгресот наведе дека сè уште не е подготвен да прогласи победа над инфлацијата. Ако добиеме повеќе добри податоци, тоа ќе ги зајакне аргументите за намалување на каматните стапки, рече Пауел.
Некои аналитичари посочуваат дека изгледите за побарувачката на нафта сѐ уште се слаби.
Меѓународната агенција за енергија (IEA), која ги советува членките на Организацијата за економска соработка и развој (ОЕCD), вклучително и водечката групација на потрошувачи, пресметала дека побарувачката се зголемила за само 710.000 барели дневно во вториот квартал, што е најслаб во повеќе од една година, главно поради забавувањето во Кина.
IEA сè уште проценува дека побарувачката ќе се зголеми за 970.000 барели дневно оваа година. Тие благо ја намалија прогнозата за растот во следната година, за 50.000 барели дневно, на 980.000 барели дневно.
Организацијата на земјите извознички на нафта (OPEC) во својот месечен извештај потврди дека очекува побарувачката да расте за 2,25 милиони барели дневно оваа година. Во 2025 година, според нивните потврдени проценки, треба да се зголеми за 1,85 милиони барели дневно.
Групацијата одделно објави дека во средата цената на барелот од референтната нафтена кошничка на нејзините членки паднала за 51 цент, на 85,40 долари.
