На првиот ден од функцијата, претседателот на Владата Христијан Мицкоски, во Штип најави инвестицијата во ветерен парк која официјално ќе биде објавена утре. Таа ќе донесе 100 милиони евра поголем приход во БДП, истакна Мицкоски, одговорајќи на новинарски прашања, и додаде дека вакви проекти ќе има уште во периодот што следува.
– Македонскиот ветер ќе донесе дополнителни 100 милиони евра годишно во БДП. Проектот ќе го објавиме утре, заедно со инвеститорот. Ветерниот парк ќе биде изграден меѓу трите општини, Карбинци, Штип и Радовиш. Се работи за инвестицијата од 400 – 450 милиони евра. Ова е исклучително значаен проект за енергетското портфолио на државата кој значително ќе го подобри перформансот на нашиот енергетски сектор. Нема специјални закони, нема загарантиран откуп по загарантирна цена за 20 – 30 години, туку инвеститор кој ќе инвестира 450 милиони евра, а државата ќе добие за 100 милиони евра поголем приход во БДП што треба да донесе 20 отсто од вкупното производство на струја што ќе ја направи енергетски балансирана земјава. Во периодот што следи ќе има уште вакви убави изненадувања, нагласи Мицкоски.
Тој присуствуваше на поставување камен-темелник на новата спортска сала „Џексон”, направи увид во градењето на новиот булевар „Илинденска“, а потоа заедно со министерот за здравство Арбен Тараври, и увид во состојбата на штипската болница.
Порача дека новата Влада ќе гради онаму каде нејзините претходници оставиле неуспешни проекти.
