Фудбалската репрезентација на Иран стана третиот учесник на Светското првенство коешто ќе се одржи од 14 јуни до 15 јули следната 2018 година во Русија, а пласманот го обезбедија со домашната победа над Узбекистан од 2:0 (1:0) во мечот од 8-то коло на Групата А, последниот круг од азиската квалификациска зона.
Стрелци за клучната победа беа Сардар Азмун во 23 и Мехди Тареми во 88 минута од натпреварот.
Со оваа победа Иран стаса до 20 бодови, недостижни осум повеќе од третиот Узбекистан, а директниот пласман на Светското првенство го обезбедуваат двете првопласирани репрезентации од двете групи од завршниот круг.
Пред Иран, пласман на мундијалот обезбеди само Бразил како водечки во јужноамериканските квалификации, и се разбира Русија, како домаќин.
Второто место во азиската Група А го има Јужна Кореја со 13 бодови и натпревар помалку, а на последните три позиции се Сирија со 8, Кина со 5 и Катар со 4 бодови.
Во вторник играат Сирија – Кина и Катар – Јужна Кореја.
