Директорот на Здравствен дом Скопје, доктор Виктор Исјановски во вечерашното гостување во „Топ Тема“ истакна дека луѓето во домовите за стари лица ќе бидат вакцинирани со мобилни тимови, дека имаат доволно возила, со кои ќе се задржи ладниот ланец на вакцината, но повика Министерството за здравство да ги каже насоките.
Тој вели дека не се исклучува можноста да се отворат повеќе вакцинални пунктови, освен најавените три во Скопје, но се зависи од тоа колку граѓаните ќе се пријават за вакцинација.
Порачува Министерството за здравство да излезе со соопштение каков е и дали има одреден ризик за вакцинирање на луѓе со одредени хронични болести.
– Во договор со Министерството за здравство, најголемиот товар ќе го земе Здравствениот дом Скопје, во поглед на процесот на имунизација, кој ќе стартува со вакцинацијата во среда со здравствените работници. Поликлиниките ќе работат од 8 до 20 часот за вакцинација. Во однос на вакцинирање на граѓани со хронични болести, Министерството треба да излезе со соопштение, затоа што вакцините секаде се исти. Да им се пренесат на граѓаните искуствата дали преку соопштение или на сајтот. Дали претставува ризик вакцинирањето на одредени хронично болни граѓани – рече Исјановски.
