Исламски џихад, палестинско милитантно движење и сојузник на Хамас во Појасот Газа, во неделата ја осуди изјавата на американскиот претседател Доналд Трамп со која се сугерира преместување на Палестинците од енклавата во околните земји, во прв ред Египет и Јордан, велејќи дека предлогот поттикнува „воени злосторства и злосторства против човештвото“.
Повратникот во Белата куќа им рече на новинарите на летот на претседателскиот авион „Air Force One“ во саботата дека сака Јордан, Египет и другите арапски земји да примат повеќе палестински бегалци за да може опустошената област да се „исчисти“, објави Associated Press.
„Зборуваме за веројатно околу милион ипол луѓе, а ние само ја расчистуваме целата работа и велиме: ‘Знаете, готово е’“, го цитира агенцијата американскиот претседател.
Палестинското движење рече дека изјавата е во согласност со најлошите аспекти на екстремно десничарскиот ционизам, дека „ја продолжува политиката на негирање на постоењето на палестинскиот народ“ и го охрабрува „продолжувањето на воените злосторства и злосторствата против човештвото“, пренесува агенцијата France Presse (AFP).
Екстремно десничарскиот израелски министер за финансии Безалел Смотрич во неделата рече дека предлогот за „чистење“ на Трамп е „одлична идеја“.
„По години на глорификација на тероризмот, Палестинците ќе можат да воспостават нов и убав живот на друго место“, додаде Смотрич, чија партија е клучна за владината коалиција на Бенјамин Нетанјаху.
Ден претходно, на прашањето дали тоа е трајно или привремено решение, Трамп одговори дека „може да биде едното или другото“.
„Газа е буквално урнатини, таму сè е уништено, а луѓето умираат, па затоа повеќе би сакал да работам со некои арапски нации и да градам куќи и станови на друга локација, каде можеби за промена би можеле да живеат во мир“, рече американскиот претседател.
