Она што го доживеа на Халкидики, додека не заврши неговото драматично спасување од морето, ќе го памети засекогаш. 30-годишниот Иван, кој се нурнал за да ги спаси своите двајца пријатели, струите го однеле и го упатиле кон Пелион. За негова среќа, пронашол топка која, како што вели за newsit.gr, не била добро надуена. Но, таа била спас за него, бидејќи можел да се задржи и да земе здив. Без неа работите би биле уште потешки.
Авантурата на тројцата млади момчиња од Северна Македонија на Халкидики ја шокираше цела Грција. Крајбрежната стража и волонтерски спасувачки тимови дадоа се од себе и двајцата беа пронајдени живи. Потрагата продолжува за пронаоѓање на третото лице.
Спасувањето на 30-годишниот Иван вчера, недела 10.07.2022 година, на Халкидики, ги исполни со радост и неговото семејство кое беше во областа да учествува во потрагата, но и спасувачите кои му пријдоа и го извлекоа жив од морето. Добрата физичка кондиција и топката која ја нашол пред себе во морето биле она што го одржало во живот.
По спасувањето, Иван е пренесен со прва помош во Здравствениот дом Касандра на Халкидики, а оттаму во болницата Папаниколау во Солун, каде што е и денеска. Тој е крајно загрижен за судбината на својот трет пријател, зборува за newsit.gr и ги опишува тешките моменти кои ги поминал сите тие часови во морето:
– Мојата авантура буквално никогаш не заврши. Мачењето од брановите сè уште се гледа на моето тело, макотрпен беше напорот што го вложив со мускулите за да се задржам. Бескрајното количество солена вода што го испив во морето и дехидрацијата што ја претрпев многу ми отежнуваат. Но, тука е и психолошкиот фактор во целото ова, што всушност е полошо, затоа и не размислувам толку за болката.
Првиот повик за помош беше во 16:13 кога влегов во вода и се обидував да му помогнам на мојот пријател да се смири.
– Ме најдоа следниот ден веднаш по 12.00 часот. Во морето бев околу 20 часа. Толку часови вознемиреност за мене и за моите пријатели. Во исто време се обидував да се спасам. Топката што ја најдов беше полунадуена и едвај се држев за неа со рака за да останам на површината.
– Сигурно ми помогна тоа што ја најдов топката, но она што навистина ми го спаси животот, беа спасувачките тимови и од се срце им благодарам, заклучува 30-годишникот во сведоштво за newsit.gr.
Потрагата за спасување на 28-годишникот продолжува и денеска на море и на копно и ѝ помагаат два брода на крајбрежната стража, хеликоптер на воздухопловните сили од воздух, како и спасувачи доброволци од OFKATH и грчкиот спасувачки тим.
