Три лица загинаа во средата вечерта во хеликоптерска несреќа кај Парма во северна Италија, меѓу кои и директорот на компанијата за производство на салами „Rovagnati“, објавија италијанските медиуми.
Околностите за несреќата засега се нејасни, но познато е дека густата магла го покрила областа во моментот кога хеликоптерот се урнал на земјиште во сопственост на семејството Ровањати.
Според агенцијата Ansa и дневниот весник La Stampa, една од трите жртви е Лоренцо Ровањати, кој ја водел компанијата заедно со неговиот брат Феручио.
Компанијата вработува, според нивната веб-страница, повеќе од илјада луѓе ширум светот и има филијали во Белгија, Франција, Германија и САД.
