Примателите на социјална помош беа известени преку СМС минатиот петок. Според пишувањата на медиумите, околу 169.000 домаќинства биле погодени од драстичното намалување на социјалната помош.
Набљудувачите веруваат дека исплатите, познати како Приходи на граѓаните, би можеле да бидат суспендирани за дополнителни 80.000 домаќинства кон крајот на летото. Традиционално посиромашниот југ од земјата е особено погоден од новите мерки. Неапол, на пример, има најголем број луѓе кои добиваат бенефиции.
Социјални примања отсега ќе можат да добиваат само домаќинствата со малолетни лица, лицата со попреченост или лицата над 65 години. Синдикатите и активистичките групи повикаа на протести против намалувањата. Во некои јужни градови се одржаа протести пред канцеларијата на агенцијата за социјална заштита ИНПС.
Во Сицилија, во општина Терасини, невработен маж вчера го истури својот гнев и упадна во канцеларијата на градоначалникот, полевајќи ја со бензин и заканувајќи се дека ќе запали сѐ, но брзо беше спречен. Опозициските политичари остро ја критикуваа владината мерка.
Поранешниот премиер Џузепе Конте, кој ги воведе бенефициите во 2019 година, го нарече потегот „идеолошка војна што се води врз грбот на најранливите“. Социјалдемократката Ели Шлајн ги нарече кратењата „брутални“. Критичарите стравуваат од „општествена катастрофа“. Негодување предизвика и тоа што кратењето беше објавено преку СМС.
