Заменик-директорот на затворот Идризово, Феми Јонузи, вели дека не ја знае точната причина како дошло до опожарување на неговиот службен автомобил. Тврди дека не добивал никакви претходни закани. Вештаците сметаат дека причина за пожарот може да биде и електричната инсталација во автомобилот.
„Синоќа околу 20.45 часот влегов во џамија. Во 21.15 часот беше алармирано дека надвор гори возило. Жителите помогнаа да го изгаснеме. Го пријавивме случајот и веднаш дојдоа за увид. Според вештаците првичните податоци говорат дека пожарот бил поради некаков електронски дефект. Не можам да потврдам дека овој случај е поврзан со случајот од пред неколку дена кога на затворски полицаец кој имал закани, му беше запалено возилото бидејќи немам закани од никого. Но, тоа треба да го потврдат вештаците и полицијата“, наведува Феми Јонузи, заменик-директор на затворот Идризово.
Од МВР велат дека ги презеле сите мерки за расчистување на случајот.
„На 17.4.2023 година во 22:34 часот во Полициска станица – Драчево, С.Ј.(45) од с.Студеничани – Скопје, пријавил дека околу 21:15 часот во с.Студеничани, било запалено возило Фолксваген пасат караван со скопски таблички сопственост на Затворот Идризово кое претходно го паркирал. Извршено е вештачење и се преземаат мерки за расчистување на случајот“, велат од МВР.
Ова е втор случај за една недела да изгори автомобил на вработен во затворот Идризово. Пред неколку дена беше опожарен автомобилот на полицаецот Африм Реџепи.
