Израелската армија објави дневна „тактичка пауза“ во своите активности во јужниот дел на палестинската енклава Појасот Газа за да дозволи повеќе испораки на помош.
Паузата „ќе се одржува од 08:00 до 19:00 часот секој ден до понатамошно известување по патот што води од преминот Керем Шалом до патот Салах ал-Дин, а потоа понатаму на север“, објавија израелската армија на платформа X. Целта на паузата е „да се зголеми количината на хуманитарна помош што влегува во Газа“, се додава во објавата.
Рутата се протега на југ од градот Рафах во јужниот дел на Газа, каде што израелската војска продолжува со меѓународните операции.
Одлуката е донесена како дел од напорите за „зголемување на количеството хуманитарна помош што влегува во Појасот Газа“ по разговорите со Обединетите нации и други организации, соопшти армијата.
Тоа доаѓа во време кога, на дипломатскиот фронт, надежите за прекин на огнот се чини дека исчезнуваат поради спротиставените барања на Израел и на Хамас, кои оставаат мали шанси за реализација на планот што го објави американскиот претседател Џо Бајден на крајот од мај.
Според ОН, гладот му се заканува на Појасот Газа, каде што 75 отсто од околу 2,4 милиони жители се раселени поради војната. Повеќе од 8.000 деца на возраст под пет години се лекувани од акутна неухранетост во Газа, покажуваат податоците на Светската здравствена организација (СЗО).
Израел го смета Рафах за последното упориште на палестинската милитантна група Хамас. Акциите на израелската армија беа критикувани на меѓународно ниво, особено операцијата во Рафах, каде што многу Палестинци побараа засолниште од војната.
