За време на средбата, како што соопшти денеска Министерството за одбрана, заемно било констатирано дека Македонија и Канада имаат одлична билатерална соработка особено во делот на одбраната. Спикерот на Сенатот, Фури изразил безрезервна поддршка која Канада ја дава на Република Македонија за полноправно членство во НАТО. Министерот Јолевски, пак, се заблагодарил за можноста која ја користат припадниците на АРМ и МО за обуки и усовршување во Канада.
Министерот Јолевски во Канада учествувал и на Форум на тема „Мигрантската криза и нејзиниот импакт врз земјите од т.н. Западен Балкан, ЕУ и НАТО“, во организација на Амбасадата на Република Македонија во Канада, кој се одржа на престижниот Карлтон Универзитет во Отава.
На Форумот учествувале и македонскиот амбасадор во Канада, Тони Димовски, Џули Линдхоут, претседател на НАТО Асоцијацијата на Канада и Алисон ЛеКлер, генерален директор за Источна Европа и Евроазија при Министерството за надворешни работи на Канада.
За време на излагањето на Форумот, министерот Јолевски истакнал дека мигрантската криза е сериозен предизвик за Европа и дека е потребно да се најде сеопфатен пристап и акции за изнаоѓање решенија за нејзино надминување на краток, среден и долг рок. При тоа навел дека Македонија благодарение на одличната соработка со земјите од регионот, го регулираше протокот на мигрантите и го оневозможуваше илегалното преминување на нашата граница.
Тој повикал на глобален координиран ангажман во насока на справување со хуманитарните, безбедносните и пошироките геополитички аспекти на бегалската криза. Канадските учесници на Форумот, ја истакнале позитивната улога на Македонија во однос на бегалската криза и ја истакнале потребата од доделување поголема финансиска и техничка асистенција на Република Македонија и другите земји во регионот кои непосредно се соочуваат со бегалската криза.
За време на работната посета на Канада, Министерот Јолевски ќе учествува и на најголемиот безбедносен форум на северно-американскиот континент кој се одржува во канадскиот град Халифакс.
