Алексеј Навални „горе-долу“ закрепна по штрајкот со глад и дозволено му е да комуницира со своето семејство, изјави денеска директорот на руската Федерална служба за затвори, Александар Калашников, пренесува Тасс.
Овој најекспониран критичар на политиките на претседателот Владимир Путин издржува 2,5-годишна затворска казна за прекршување на условната слобода.
– Можам да кажам дека повеќе или помалку тој закрепнува. Веќе има 82 килограми, јаде нормално и може да комуницира со своето семејство – изјави Калашников.
Опозицискиот политичар Навални (44) штрајкуваше со глад на крајот на март во обид да добие соодветно лекување во затвор поради акутните болки во грбот и во нозете.
Влошувањето на неговата здравствена состојба ги поттикна неговите сојузници да ги повикаат приврзаниците на улицата да бараат да му се обезбеди соодветна грижа, но одговорот на овие собири беше поскромен отколку што се очекуваше.
Навални, кој преживеа труење со нервен агенс минатата година, според германските лекари штрајкот со глад го прекина во април, откако доби подобар третман.
Иван Жданов, еден од најблиските сојузници на Навални, денеска изјави дека здравствената состојба на Навални генерално е задоволителна.
