Властите на американската сојузна држава Калифорнија му нарадија на населението да носи маски на повеќето места надвор од нивните домовои, образложувајќи дека новото правило е неопходно бидејќи премноги граѓани го занемаруваат покривањето на лицето во текот на епидемијата на коронавирусот.
Во Калифорнија ќе мора да се носи маска на отворените простори и во секој затворен простор. Исклучок се рестораните, за да можат луѓето да јадат и да пијат, како и рекреациските активности на отворено, сѐ додека се одржува физичката дистанца.
„Науката покажува дека прекривањето на лицете и маските делуваат. Клучно е луѓето околу вас да бидат безбедни, продавниците да бидат отворени и да се придвижи економијата“, изјави гувернерот Гевин Њусом во соопштение.
Медиумите наведуваат дека сѐ уште не е јасно на кој начин оваа уредба ќе се спроведува.
Калифорнија беше првата од американските сојузни држави кои побараа од населението да остане дома, уште на 19-ти март.
Според последните податоци, во Калифорнија се регистрирани околу 161.000 случаи на зараза, а бројот на починатите е 5.290 луѓе.
