Македонски камион се судри со српски автобус со азиланти. Најмалку едно лице загина, а девет се повредени во страшна сообраќајна несреќа што се случи синоќа околу 22. 30 часот на патот Врање-Прешево во близина на Бујановац.
„Новости“ пишува дека во несреќата животот го загубила една жена, мигрантка, чиј идентитет допрва се утврдува.
Несреќата се случила во неделата кога камион со македонски регистарски таблици се судрил со српски автобус кој превезувал азиланти од Прешево кон Врање и Белград.
Според српските медиуми на местото на несреќата биле присутни четири амбулантни возила. Повредените биле префрлени во болницата во Врање.
Додека траел увидот на лице местото сообраќајот на овој патен правец бил во прекин, но во текот на ноќта бил нормализиран.
