Канадската разузнавачка агенција заклучи дека Кина се мешала во нејзините парламентарни избори, според официјалната истрага чиишто наоди беа објавени во понеделникот.
Канадската разузнавачка агенција CSIS тврди дека Кина се мешала во изборите во 2019 и во 2021 година. И во двата изборни циклуса победи Либералната партија на премиерот Џастин Трудо.
Тој назначи комисија за истражување на странското мешање во демократскиот процес под притисок на опозициските пратеници загрижени поради медиумските извештаи за можната улога на Кина. Во понеделникот, на комисијата ѝ беше презентиран дел од брифингот на CSIS од февруари 2023 година.
„Знаеме дека Народна Република Кина тајно и со измама се мешаше во изборите во 2019 и 2021 година… Во двата случаи, овие активности на странско влијание беа прагматични и првенствено фокусирани на поддршка на оние кои се сметаат за прокинески или неутрални (кон владата во Пекинг)“, се наведува во еден од презентираните исечоци.
Ерин О’Тул, лидер на конзервативците за време на кампањата во 2021 година, тврдеше дека неговата партија изгубила до девет места во парламентот поради кинеското влијание, но додаде дека тоа не го променило драстично правецот на изборите.
CSIS оценува дека кинески „државни актери“ можеле успешно да влијаат на изборниот процес во Канада, бидејќи нема никакви правни или политички последици. Разузнавачките аналитичари и конзервативците веруваат дека владата на Трудо не направила доволно за да се спротивстави на кинеското влијание. Канадскиот премиер затоа во среда ќе сведочи пред комисијата.
Конзервативците, традиционално построги кон Кина од либералите, во 2021 година водеа кампања на платформа која го осуди третманот на Пекинг кон пратурското муслиманско малцинство Ујгури и повикаа на „Huawei“ да му се забрани на 5G мрежата.
Според пописот од 2021 година, во Канада живеат околу 1,7 милиони луѓе со кинеско потекло кои сочинуваат околу 5 проценти од населението.
