Хрватскиот ракометен репрезентативец Игор Карачиќ потврди во понеделникот дека и следната натпреварувачка сезона останува дел од македонскиот и актуелен шампион Вардар.
„Имам договор и за следната сезона и сигурно останувам. Потоа, сѐ е во магла. Ќе видиме што ќе биде. По оваа сезона ќе имаме многу промени во играчкиот кадар. Многу ќе заминат, но очекувам и да дојдат засилувања“, изјавил Карачиќ за хрватските медиуми.
Осврнувајќи се на резултатите кои „црвено-црните“ ги постигнаа во текот на целата календарска 2017 година, Карачиќ нагласува дека тоа е резултат на напорна работа.
„Вардар е зрел тим, тоа е резултат на напорите во изминатите четири години. Постигнавме огромен успех за македонскиот спорт, колку се цени тоа во земјата, најдобро се гледа по тоа што државата ги одликува Македонците од екипата“, нагласува хрватскиот бек.
Што се однесува до очекувањата, тој потврди дека и сезонава Вардар атакува на највисок пласман, во најмала рака пласман на завршниот „фајнал-фор“ турнир.
„Нема да зборувам за одбрана на титулата шампиони на Европа, но, императивот е да се пласираме на Ф4 турнирот. Се надевам дека нема да застанеме на тоа. Не очекува пауза во Лигата на шампионите до февруари и ќе се обидеме што подобро да се подготвиме за следните предизвици“, изјави Карачиќ.
Тој ќе ѝ се приклучи на селекцијата на Хрватаска со која ќе се обиде да ја искористи предноста на домашниот терен и поддршката од публиката на претстојното Еевропско првенство чиј домаќин ќе биде токму неговата земја.
