Државниот санитарен и здравствен инспекторат донесе решение со кое на Катлановска бања ѝ се забранува да дава здравствени услуги, бидејќи при вонредниот надзор направен минатиот месец констатирале дека овој правен субјект нема дозвола од Министерство за здравство за вршење здравствена дејност.
Д-р Ирина Сотирова Бухова, директор на ДСЗИ, рече дека при вонредната контрола, која ја направиле на 14 минатиот месец по анонимна дојава, во Катлановска бања затекнале тројца доктори, кои не е македонски државјани и кои немале лиценца за работа во земјава, како даваат здравствени услуги. Затекнатите странски доктори биле анестезиолог, дефектолог и ортопед.
„При надзорот правниот субјект не даде на увид дозвола за вршење здравствена дејност од Министерството за здравство, поради што донесовме решение со кое на овој субјект му се изрекува забрана за вршење на здравствени услуги. Тоа значи дека не се забранува бањско рекреативно лекување, но сите здравствени услуги за кои пациенти се упатуваат да ги добијат на товар на ФЗОМ се забранети. Тоа вклучува и медицинска рехабилитација и прегледи“, рече Бухова.
Покрај ДСЗИ во Катлановска бања е и финансиската полиција. Оттаму денеска ни потврдија дека е во тек предистражна постапка и наскоро ќе соопштат дали и какви неправилности откриле.
