Ирската државна истрага откри „шокантни“ нивоа на сексуална злоупотреба во верските училишта, првенствено оние што ги води Католичката црква, со 2.395 обвинувања за речиси сто години, соопшти владата. Прелиминарната „сеопфатна истрага“ откри 884 наводни сексуални злоставувачи во повеќе од 300 училишта низ земјата од 1927 до 2013 година. Повеќето од случаите биле помеѓу 1960-тите и 1990-тите, соопшти владата.
Следниот чекор ќе биде формирање истражна комисија која најверојатно ќе открие дополнителни случаи, рече министерката за образование Норма Фоли на прес-конференција.
– Нивото на злоупотреба е шокантно. Тоа е навистина шокантно, како и бројот на наводните насилници, рече Фоли.
Прелиминарната истрага се заснова на евиденцијата на верските институции и на исказите на жртвите. Тоа е последниот во серијата извештаи во последните децении за наводна злоупотреба и малтретирање од страна на свештениците и членовите на црковните редови, главно во Католичката црква, која предничи во Ирска.
Документот ќе биде објавен откако ќе биде доставен до жртвите, пренесуваат локалните медиуми.
