Кошаркарите на Кливленд Кавалирс израмнија на 2-2 ноќта кон понеделникот во серијата до четири победи во четвртиот натпревар од доигрувањето во Источната конференција на НБА лигата, откако ги совладаа Индијана Пејсерс со 104:100
Кавалирс избегнаа катастрофа во Индијана, откако до крајот на третата четвртина ја загубија предноста од 16 кошеви (49:33) дозволувајќи им на Пејсерс целосно да се вратат во мечот.
Леброн Џејмс, иако во третата четвртина погоди само еден кош, натпреварот го заврши со 32 поени и 13 скокови. Кајли Ковер постигна 18 кошеви за Кливленд, додека Индијана ја предводеше Домантас Сабонис со 18 поени. Петтиот дуел се игра во среда во Кливленд.
Голден Стејт Вориорс не успеаја да ја завршат серијата изминатата ноќ, откако во четвртиот натпревар во плеј-офот на Западната конференција беа совладани од Сан Антонио Спарс со 90:103. Спарс ја имаа предноста во текот на целиот натпревар, најголемата разлика во првото полувреме беше десет, а во второто 17 поени.
Петтиот меч од серијата се игра во вторник во Окленд, каде што Вориорс ќе имаат можноста да го остварат пласманот во вториот круг од доигрувањето. Доколку победат, во вториот круг ги очекува Њу Орлеанс Пеликанс.
Спарси од клупата ги предводеше Еторе Месина, бидејќи Грег Попович, кому му минатата седмица му почина сопругата Ерин одлучи да остане со семејството.
Лемаркус Олдриџ беше најдобриот стрелец кај домашните со 22 поени и 10 скокови, а Емануел Џинобили додаде 16 поени. На Вориорс не им помогнаа ниту Кевин Дјурент кој даде 34 кошеви со 13 скокови, ниту Дрејмонд Грин кој постигна 18 поени.
Вашингтон Визардс, исто така, израмнија на 2-2 со победата на Торонто Репторс со 106:98. Бредли Бил постигна 31 кош, а Џон Вол 27 за победата на Визардс. Демар Дерозен, пак, беше најфикасен кај Репторс со 35 поени, шест скокови и исто толку асистенции.
Милвоки Бакс со победата од 104:102 над Бостон Селтикс израмнија во серијата на 2-2. Победата им ја донесе Јанис Антетокунпо кој постигна кош на 5,1 секунди до крајот, а вкупно постигна 27 кошеви. Крис Мидлтон додаде 23 поени. Петтиот меч се игра во вторник во Бостон.
