Во основното училиште „Јохан Хајнрих – Песталоци“ денеска ќе биде отворена книга на жалост по повод смртта на 14-годишната Вања Ѓорчевска која исчезна во понеделникот, а вчера Министерството за внатрешни работи соопшти дека е пронајдено нејзиното тело.
„Со огромно жалење, скршени од болка за прерано згаснатиот живот на Вања, ве информираме дека во понеделник, од 09 часот, на службениот влез на училиштето ,,Јохан Хајнрих – Песталоци“ ќе биде отворена книга на жалост. Ги повикуваме блиските и сите граѓани кои сакаат да оддадат почит да дојдат да се потпишат. Во моментот менаџментот на училиштето во соработка со повеќе психолози се подготвува за утрешниот ден со цел обезбедување поддршка за учениците и комуникација со нив на начин со кој сите полесно ќе го пребродат овој трагичен настан“, соопшти Општина Центар.
Оттаму се бара целосно расветлување на случајот во најкус можен рок и одговорност од извршителите. Се повикуваат граѓаните да останат обединети и да не подлегуваат на шпекулации.
„Градоначалникот Герасимовски и сите вработени во Општина Центар изразуваат најдлабоко сочувство до семејството и блиските на Вања. Извршителите на овој грозоморен чин мора да одговараат во најкус рок, ги повикуваме институциите да го расветлат целосно случајот. Апелираме и до граѓаните да останат обединети во овие тешки моменти и да не подгреваат шпекулации. Нека ѝ е светол патот на Вања, ваква трагедија никогаш повеќе да не се повтори“, се наведува во соопштението од Општина Центар.
