И покрај проблемите во синџирите на снабдување поврзани со пандемијата, глобалната продажба на оружје минатата година продолжи да расте, соопшти Институтот за истражување на мирот во Стокхолм (СИПРИ).
Сто од најголемите светски компании за оружје продале тешко оружје и воени услуги во вредност од 592 милијарди долари во 2021 година, според извештајот на SIPRI.
Тоа значи пораст од 1,9 отсто во однос на претходната година. Зголемувањето е повторно повисоко отколку во 2020 година, но под просечното зголемување во четирите години пред пандемијата на коронавирус.
„Она што навистина го гледаме е веројатно побавен раст отколку што многумина очекуваа во продажбата на оружје во 2021 година“, рече Нан Тијан, коавтор на студијата.
„Долгорочното влијание на пандемијата навистина почнува да се гледа кај компаниите за оружје“, додаде тој.
Проблемите во однос на недостигот на работна сила и снабдувањето со суровини ја „забавија способноста на компаниите да произведуваат системи за оружје и да ги испорачуваат навреме“, вели тој.
Четириесет американски компании имаат 51 процент од вкупната продажба на оружје
Според податоците на SIPRI, најголем дел од воената опрема сè уште доаѓа од американски корпорации.
Четириесет американски компании – вклучувајќи ги и првите пет во рангирањето – заедно сочинуваат 51 процент од целата продажба на оружје меѓу 100-те најголеми корпорации.
Но, меѓу петте најголеми компании – Lockheed Martin, Raytheon Technologies, Boeing, Northrop Grumman и General Dynamics – само Raytheon имаше раст.
Во исто време, продажбата на осумте најголеми кинески компании се зголеми за 6,3 отсто во 2021 година.
Кина е на второ место според вкупната продажба на оружје, со удел кој нагло пораснал на 18 отсто. потоа следуваат Велика Британија со 6,8 отсто и Франција со 4,9 отсто. Германскиот удел беше 1,6 отсто.
Европските компании, кои сега претставуваат 27 од 100-те најголеми, имаат пораст од 4,2 отсто во однос на 2020 година.
