Претседателот на СДСМ Димитар Ковачевски вечерва на конгрес презентираше делови од програмата на партијата за парламентарните избори 2024, а ги соопшти и носителите и ко-носителите на изборните листи. На 28. Конгрес на партијата треба да бидат потврдени кандидатските листи, кои беа утврдени во текот на денот на седници на Извршниот и Централниот комитет на партијата.
Ковачевски соопшти дека тој е носител на листата на партијата и коалицијата во Првата изборна единица ко-носителка Моника Зајкова од ЛДП, во Втората изборна единица Оливер Спасовски и ко-носител Фатмир Битиќи, во Третата Сања Лукаревска и Љупчо Николовски, во четворката Венко Филипче и Јована Тренчевска, во петката Јован Митрески и Бисера Костадиновска-Стојчевска, додека во Шестата изборна единица листата на СДСМ ќе ја ја предводи Славјанка Петровска а зад неа е Агрон Демири.
„СДСМ на овие избори ќе понуди луѓе кои ќе ги застапуваат интересите на граѓаните и ќе го забрзаат развојот на државата“, рече Ковачевски.
Целата наша работа и посветеност, нагласи тој, беше и е во насока на тоа земјата што поскоро да стане членка на ЕУ.
„На своја кожа почуствував дека ЕУ не беше секогаш фер кон нас, но дали тоа значи дека треба да се откажеме“, рече, меѓу другото, Ковачевски.
