Ќе се менуваат протоколи за ситуација кога ќе има дојава за бомба. Тимови на МВР ќе вршат проверки за да бидат сигурни дали е лажна, а наставата во училиштата ќе продолжи.
Ова го соопшти премиерот Димитар Ковачевски, кој за попладнево најави нов состанок со Министерството за внатрешни работи и со Министерството за образование.
„Не сме ја загубиле сајбер-војната и нема да ја загубиме. Ова се случува во голем број на држави членки на НАТО. МВР веќе менува одредени протоколи за тимови кои ќе проверуваат. Имаме денеска состанок со раководството на МВР и со Министерството за образование, за носење на дополнителни мерки, со цел да овозможиме редовна и непречена настава“, кажа Ковачевски.
Тој додаде дека е родител, што значело дека ги разбира и останатите родители.
„Обврска на МВР е да ја обезбеди безбедноста на граѓаните. Согласно протоколите за борба против тероризам, тие мора да спроведуваат процедури кои се пропишани согласно закон, како во сите држави. Заради спречување на напуштање на училиштата, секојдневно се работи за да се најде начин каде ќе се обезбеди сигурност дека дојавите за бомби е лажна, а да продолжи наставата“, кажа Ковачевски.
