„Да одиме на Скопје. Ги чекаме изборите во октомври, ќе има таму и втор круг. Ќе видиме дали новата Влада добива поголема сила или не, и потоа Владата во Скопје да покаже дали може да влезе во сериозни преговори за името. Сакам да ви кажам дека проблемот за името зад себе крие и еден проблем на иредентизам, се надевам дека од нивна страна ќе бидат преземени мерки за ограничување на иредентизмот. Во Њујорк имавме средба со министерот за надворешни работи на соседната земја, Никола Димитров. Сакам да ви кажам дека станува збор за извонредно интересна личност, со кого се договоривме да создадеме комисија која ќе изврши надзор на сузбивање на иредентизмот во учебниците. До крајот на ноември се надеваме дека ќе имаме првични резултати од ова, односно да се изврши удар врз иредентизмот и врз картите со територијални претензии. Ова е многу значаен чекор“, вели шефот на грчката дипломатија.
Така, по контроверзниот договор со Бугарија, и Грција добила зелено светло од премиерот Зоран Заев да брише тоа што смета дека е спорно, пренесуваат грчките медиумил, со што новата македонска влада предводена од СДСМ и Заев продолжува директно да работи против македонските интереси и сопствената држава.
Коѕиас, во интервјуто најави дека со неговиот македонски колега Никола Димитров се договориле, како дел од мерките за градење на доверба, да се формира заедничка македонско-грчка комисија од експерти кои ќе ги разгледуваат македонските учебници, со цел да се отстранат сите иредентистички изјави, мапи и текстови.
Коѕиас, во интервјуто, најавува дека идната недела на 4 и 5-ти октомври во Солун ќе има средби со министрите за надворешни работи на Македонија, Албанија и Бугарија. Шефот на грчката дипломатија, говорејќи за државната ТВ ЕРТ откри детали од разговорите со неговиот македонски колега, за кого рече дека е интересна личност.
„Спорот со името во заднина крие еден проблем со иредентизам. Се надевам и верувам дека ќе постојат мерки од нивна страна за ограничување на иредентизмот, рече шефот на грчката дипломатија за ЕРТ.
Никос Коѕиас во интервјуто, уште еднаш порача дека прво треба да се реши името, па потоа нашата земја да се интегрира во НАТО и ЕУ, а првпат ја коментираше и Времената спогодба за која вели дека има свои слаби точки.
„Нашата соседна, пријателска земја, како што велам јас, затоа што нашите народи имаат доста пријателски односи, не може да се интегрира во меѓународна заедница, од овој тип, како што е НАТО и Европската унија, без да е решено прашањето за името, согласно со тоа што го налагаат договорите од 90-те но и Времената спогодба. Налага да се реши. Слабата точка на времената спогодба беше дека претпоставуваше дека името брзо ќе се реши и затоа даваше можност соседната земја да бара прием во меѓународни организации и не предвидуваше, и ова е една слаба точка, кои мерки ќе се преземат доколку соседната земја не преговара суштински, затоа што сите овие децении, не преговараше“, вели министерот за надворешни работи на Грција.