Кинескиот претседател Кси Џинпинг и неговиот бразилски колега по должност и домаќин Луис Инасио Лула да Силва во средата ги подигнаа дипломатските односи на повисоко ниво и склучија договори за инфраструктурата, енергијате и земјоделството, зацврстувајќи ги врските меѓу двете најголеми светски економии во развој.
Во заедничката декларација потпишана во претседателската резиденција, Кси и Лула објавија дека кинеско-бразилските односи станаа „Заедница со споделената иднина за поправеден свет и поодржлива планета“.
Двете земји потпишаа речиси 40 договори за соработка во економските сектори од земјоделството и соларната енергија до комуникациите и нуклеарната енергија, зајакнувајќи ги врските меѓу двете нации со билатерална трговија вредна повеќе од 150 милијарди долари, објави Лула.
„Односите меѓу Кина и Бразил сега се најдобри во историјата“, рече Кси, додавајќи дека Кина е подготвена да ги направи „златни партнери“.
Бразилското Министерство за земјоделство го поздрави потенцијалот за нов извоз од 450 милиони долари во Кина, бидејќи новите трговски договори го отворија кинескиот пазар за бразилски сорго, свежо грозје, сусам и рибино брашно.
Најголемиот светски извозник на пилешко, бразилскиот BRF, истовремено објави договор за купување на фабрика за преработена храна во кинеската провинција Хенан за 43 милиони долари, а планира да инвестира 36 милиони долари во проширување на фабриката.
Иако трговските односи меѓу Бразил и Кина се во пораст со децении, нивните дипломатски односи попуштија под десничарскиот претходник на Лула – Жаир Болсонаро, кој ја повторуваше антикинеската реторика на поранешниот и реизбраниот американски претседател Доналд Трамп, негов идеолошка сојузник.
За време на состанокот меѓу Лула и Кси во средата, кинеската сателитска компанија во ниската орбита на Земјата „SpaceSail“, која се обидува да го предизвика „Starlinkн“ на американскиот магнат Илон Маск, потпиша договор со бразилскиот државен телеком „Telebras“ за влез на бразилскиот пазар.
Бразилската државна банка BNDES соопшти дека договорила заем од пет милијарди јуани (655 милиони евра) од Кинеската банка за развој, што е прва таква операција деноминирана во кинеска валута.
