КУД „Дримкол“ од Вевчани ќе ја претставува Република Македонија во Баку, Азербејџан, на манифестацијата Денови на македонското културно наследство, што ќе се одржи од 9 до 11 ноември во Баку.
Централно место на манифестацијата ќе заземе настапот на Културно-уметничкото друштво „Дримкол“ од Вевчани со целовечерна програма, на која ќе бидат презентирани традиционални песни и ора, носии и обичаи на Република Македонија.
Во рамките на оваа манифестација, проф. д-р Рубин Земон, претседател на Научниот совет на Институтот за социо-културна антропологија на Македонија, ќе одржи предавање за богатото мултикултурно наследство на Македонија, придружено со прикажување на неколку документарни етнолошки филмови.
Исто така, ќе биде поставена и изложба на современи фотографии од културното наследство на Македонија, изготвени во соработка со Центарот за научни истражувања и промоција на културата „ХАЕМУС“ од Скопје, предводена од м-р Василка Димитровска.
Организатор и домаќин на манифестацијата „Денови на македонското културно наследство во Азербејџан“ ќе биде Организацијата за поддршка и истражување на културното наследство „МИРАС“ од Баку, Азеребејџан, предводена од проф. д-р Фариз Кхалили.
Деновите на македонското културно наследство се поддржани од Министерството за култура на Република Македонија.