Синоќа на плоштадот во Тетово по повод посетата на косовскиот премиер Аљбин Курти, домаќинот Билал Касами организираше голема манифестација. И тука, како и во Чаир претходно немаше ниту едно македонско знаме, а настаните се одвиваа само на албански јазик, без превод на македонски јазик за новинарите од македонските редакции. Во Тетово беше завеано и знаме со карта на „голема Албанија“, а оваа фотографија е објавена на официјалниот фејсбук-профил на градоначалникот Касами.
Покрај Касами и Мурти, во првите редови на собирот во Тетово беа и Иџет Меџити, основач на нова политичка партија на Албанците во Македонија и Африм Гаши, претседателот на Алтернатива.
Организатор на настанот беше Општина Тетово.
На знамето со картата на „голема Албанија“ се и ликовите на Иса Болетини и на Исмаил Џемаили.
Болетини е албански националистички борец, кој кон крајот на 19 и почетокот на 20 век, се борел против Отоманската империја и против српските и црногорски сили. Болетини е еден од најголемите борци за Голема Албанија. Во Сарај има споменик на Болетини.
Џемаили е албански државник кој учествувал во пишувањето на албанската декларација за независност. Бил прв премиер и министер за надворешни работи на независна Албанија од 1912 до 1914 година.
