Во последниот дуел од саботната програма на деветтото коло од шпанското фудбалско првенство мадридски Атлетико славеше со 1:0 на гостувањето кај истоимениот клуб во баскиската престолнина Билбао.
Единствениот погодок на дуелот го постигна францускиот напаѓач Антоан Гризман во 47 минута на додавање на Мората. Мадридскиот тим е во проблеми, бидејќи првиот голман Словенецот Јан Облак мораше да го напушти теренот поради повреда во 69 минута, а го замени Хрватот Иво Грбиќ.
По овој меч двата клуба ги заменија привремено местата на табелата, сега Атлетико Мадрид е трет со 19 бодови а Атлетик Билбао е четврти со 17 бодови. Реал Бетис со меч помалку има 16 бодови.
Севилја на гостински терен ја совлада Мајорка, исто така, со 1:0. Единствениот погодок го постигна српскиот интернационалец Немања Гудељ кој во 53 минута од голема оддалеченост го совлада сонародникот Предраг Рајковиќ.
И покрај поразот Мајорка остана пред Севилја на табелата. Двата тима со по 9 бодови се на 12-то односно 13-то место.
Жирона на домашен терен длабоко во судиското продолжение успеа да спаси бод во дуелот со Кадиз. Гостите поведоа на самиот почеток од второто полувреме со голот на Алекс Фернандез, а домашните израмнија дури во 12 минута од судиското продолжение на мечот, кога најстрога казна реализираше Кристијан Стуани.
Жирона моментално се одржа на 14-то место со 8 бодови, а Кадиз е претпоследен 19-ти со 6 водови.
Валенсија и Елче ремизираа 2:2, откако по еднаш беа во водство, а и двата тима имаа двоен стрелец на овој меч. Гостите поведоа од пеналот кој во 29 минута го реализираше Пере Мила, но домашните израмнија, исто така, од пенал во 41 минута, а стрелец беше Единсон Каван. Уругвајскиот ветеран со својот втор погодок направи резултатски пресврт во седмата минута од судиското продолжение на првиот дел, а Мила во 65 минута повторно погоди за конечните 2:2.
Валенсија е седма со 14 бодови, а Елче без ниедна победа и со само три бода е последен 20-ти.
Во недела на мадридскиот стадион „Сантијаго Бернабеу“ се игра големото Ел Класико меѓу Реал и Барселона. Во другите дуели се среќаваат Еспањол – Вајадолид, Селта Виго – Реал Сосиедад, Реал Бетис – Алмерија а колото во понеделник го затвораат Виљареал – Осасуна
