Лидерот на радикалната исламистичка организација Хамас, одговорен за нападот врз Израел на 7 октомври, побарал поддршка од властите на БиХ во специјално писмо што го испратил на адреса на министерот за надворешни работи на Босна и Херцеговина, Елмедин Конаковиќ, објавија во средата локалните медиуми.
Порталот istraga.ba објави копија од писмото потпишано од Исмаил Ханија, политичкиот лидер на Хамас, а испратено на адресата на Конаковиќ на 11 октомври. Копијата изгледа автентично, а писмото е на хартија која ги содржи официјалните ознаки на оваа организација.
Опишувајќи ја на долго историјата на израелско-палестинскиот конфликт како што ја гледа, Ханија го обвини Израел за најлошите злосторства, истакнувајќи дека еврејската држава сега е предводена од „ционистичката фанатична десница“ која спроведува „фашистичка и расистичка окупација“ и со кои не може да има договор и најави дека Хамас затоа решително ќе се бори за остварување на легитимните права на Палестинците.
Тој напишал и дека операцијата „Ал Акса“, како масовен напад врз израелските цивили на 7 октомври, во кој беа убиени 1.300 мажи, жени и деца, ќе продолжи.
„Ги повикуваме сите арапски и исламски народи и сите слободни луѓе ширум светот да преземат итна акција и да мобилизираат помош и солидарност во сите форми за заштита на историските права на Палестинците“, се вели во писмото на лидерот на Хамас.
Министерството за надворешни работи на БиХ не го коментирало ова писмо, но партијата Народ и Правда (НиП), на чело со Конаковиќ, во четвртокот ги изрази своите ставови за конфликтите на Блискиот Исток со соопштение во кое го осудува секое насилство, особено насилството врз цивилите.
„Осудувајќи го насилството, повикуваме на воспоставување траен и праведен мир во овој дел од светот. Нема алтернатива за прекин на окупацијата на палестинските територии, деблокирање на Газа и барање мирно решение за соживот на палестинската и израелската држава“, се вели во соопштението.
