Лиз Трас денеска беше избрана за нов премиер на Велика Британија. Таа го победи Риши Сунак во трката за лидер на владејачката Конзервативна партија, пренесува Ројтерс.
Трас ќе ја преземе функцијата утре.
По три месеци кампања, околу 200.000 членови на Конзервативната партија гласаа за наследник на Борис Џонсон ова лето.
На 7 јули Џонсон ја објави својата оставка како премиер, што дојде по зголемениот политички притисок, што доведе до масовни оставки на неговите министри.
Трас е поранешна министерка за надворешни работи и лидер на Конзервативната партија. Таа со 81.326 гласови го победи својот противкандидат Риши Сунак кој имаше 60.399 гласови.
Трас од утре ќе почне да ги извршува премиерските должности откако ќе биде официјално назначена од кралицата Елизабета Втора.
Таа е третата жена премиер на Велика Британија во историјата, по Маргарет Тачер и Тереза Меј. Како што потсетува Би-Би-Си, кога Лиз Трас имала седум години, ја имитирала Маргарет Тачер, која убедливо победила во 1983 година, во имитација во нејзиното училиште. Триесет и девет години подоцна, таа навистина ги следи стапките на Железната дама и стана лидер на Конзервативната партија и премиер.
По долга политичка битка за премиерската функција на Велика Британија, Трас стана наследникот на Борис Џонсон, кој беше сменет од лидерската позиција по серијата скандали што предизвикаа да ја изгуби поддршката од партијата. Британските медиуми пишуваат дека новиот премиер веднаш ќе биде под притисок да објави план за решавање на рапидно растечките сметки за струја. Покрај тоа, Трас ја наследува економијата што пропаѓа, со највисока инфлација во последните 40 години. Многумина се оптимисти дека новиот премиер ќе ги поддржи плановите за замрзнување на таканаречената енергетска граница, максималната цена за домашниот гас и електрична енергија, што ја поставува регулаторот Офгем на секои три месеци.
