-Би очекувал по најавите дека ќе има јасен политички повик до сите политички партии во Собранието да дадат поддршка на уставните измени и да не ја блокираат сопствената држава. Ние скринингот го завршивме и навистина се надеваме и работиме на тоа да се дојде до 80 пратеници, меѓутоа нема да правиме притисок, ние објаснуваме и ќе продолжиме тоа да го правиме, бидејќи обврската останува и за овој парламентарен состав и за наредниот“.
Ова го нагласи вицепремиерот за европски прашања Бојан Маричиќ во дневникот на Сител телевизија, откако претходно во заклучоците усвоени на денешното заседание на Советот за општи работи на Унијата, беше наведено дека Македонија ќе го продолжи преговарачкиот процес со ЕУ откако ќе бидат усвоени уставните амандмани, што е предвидено со Преговарачката рамка и со заклучоците на Советот на ЕУ од јули 2022 година.
– Нашата стуација очекувам да биде формулирана на начин што ќе се пофали скринингот, ќе се укаже и ќе се направи генеза како сме ги почнале преговорите минатата година и во која фаза сме сега дојдени и ќе се изрази повторната подготвеност, како што е запишано во заклучоците од минатата година и преговарачката рамка дека во моментот кога ќе бидат извршени уставните измени веднаш без нова политичка одлука и без дополнителни одлагања ќе се свика втората меѓувладината конференција за да се отвори првиот кластер, рече Маричиќ.
Додаде дека околу 1000 луѓе во сите делегации, 100 работни дена направиле 850 презентации и одговориле на стотици прашања, и сето тоа доаѓа од повеќе од 200 институции. Според него, тоа бил масовен длабински процес, што ни кажал каде сме и колку и што ни треба за да бидеме членки на ЕУ и да ги достигниме европските стандарди.
– Политиката на блокирање на сопствената држава, според мои очекувања, ќе биде поразена на изборите од овој европски фронт и од оваа коалиција и потоа веќе без никакви аргументи ќе останат оние кои си ја блокираат веќе сопствената држава година и половина, изјави вицепремиерот Маричиќ.
Во однос на предлогот Талат Џафери да биде технички премиер во преодната влада, тој рече дека премиерот и претседател на СДСМ Димитар Ковачевски, претседателот на ДУИ Али Ахмети и претседателот на АА Арбен Таравари, како лидери на трите најголеми партии во владината коалиција, се во постојана комуникација и консултација.
Рече дека дава целосна поддршка за Талат Џафери, бидејќи има и знаење и искуство и политичко и животно за успешно да ја води техничката влада во тој период кога е предвидено.
