Уставните измени не се случуваат од денес за утре и во моментот кога ќе се искреира платформа што може да добие поддршка од 80 пратеници, ќе почне процедурата во Собрание за промена на Уставот, изјави вечерва вицепремиерот за евроинтеграции Бојан Маричиќ, потврдувајќи дека Владата во моментов нема обезбедено такво мнозинстов, а најавувајќи дека очекува тоа да се случи во првата половина наредната година.
Маричиќ во гостувањето во емисијата „Само вистина“ на Канал 5 телевизија посочи дека за претходните промени на Уставот пред четири години имаше процес кој траеше една година, признавајќи дека без поддршка на пратеници од ВМРО-ДПМНЕ не може да се обезбеди потребното двотретинско мнозинство во парламентот за сегашните уставни измени.
„Блокадата првпат е во наши раце. Досега секогаш блокадата беше во Софија, Атина, Париз… Денес е во наши раце и од нас зависи дали ќе застанеме по скринингот на истото место или ќе продолжиме со поглавјата. Имаме комуникација со сите пратенички групи и со сите пратеници. И јас сум убеден дека со помош на меѓународните партнери и со наш ангажман како Влада, ќе дојдеме до 80 пратеници, затоа што за мене е незамисливо дека ние самите ќе се блокираме. Има интерес веќе од германскиот канцелар и од францускиот претседател и од сите да помогнат на сите можни начини за да дојдеме до 80 пратеници, нагласи Маричиќ во однос на обврската да се донесат уставните измени кои предвидуваат вклучување на Бугарите во Уставот за земјата, пред да почне отворањето на поглавјата во процесот на пристапните преговори на земјата со ЕУ.
Додаде дека во заклучоците на Советот на ЕУ пишува дека во моментот кога ќе биде променет Уставот за да се внесат уште три заедници во него, без нови одлуки и без одлагање ќе се свика втората Меѓувладина конференција на која што ќе започне да се разговара за поглавјата.
„Ние инсистиравме на таа формулација за да не биде оваа реторика од опозицијата дека ќе имало уште три/четири или не знам колку барања. Исто така, инсистиравме да се тргнат сите оние прашања, бидејќи имаше многу поинакви верзии на преговарачката рамка и сите прашања кои што се однесуваат на билатералните прашања да бидат ставени во протокол меѓу нас и Бугарија. И сега во однос на јазикот, ние кога влеговме во дискусијата не беше наша цел да ја убедиме Бугарија во нешто, дали ќе го признае или не македонскиот јазик, наша цел беше ЕУ да не го прифати бугарскиот став и да можеме да го потпишеме договорот за Фронтекс на македонски јазик“, рече Маричиќ.
Толкуваше дека Бугарија праќала ноти за јазикот „насекаде, па и во ОН, а фамата околу тоа ја прават луѓето кои не испорачаа ништо за шест години плашејќи се за нивната политичка кариера“, без да каже на што точно мисли.
Во однос на бугарските клубови во земјата, Маричиќ нагласи дека биле прифатени измените на Законот за здруженија за да спречи натамошно ширење на, како што нагласи, „ова тензично отворање на клубовите“
„Во принцип никој нема против отворање на бугарски културни центри, еве се отвори еден, заедно со министрите за култура од двете држави, заедно со проследување од целата јавност, без никаков проблем. Проблемот е во имињата и во називите на клубовите. Ние испитуваме и во Обвинителството имаше постапка. Она што е многу важно, е формата да се запази, за да не бидеме утре тужени и да изгубиме во Стразбур и да испадне уште дека навистина сме вршеле некаква репресија, а знаеме дека не сме вршеле. Знаеме дека кај нас слободно може да се здружуваат луѓето. Не сакаме да даваме аргументи на Бугарија дека овде има некаква репресија. Но, ве уверувам дека овој процес ќе биде ставен во законски рамки, ќе биде ставен под контрола и нема да се дозволи ниту еден клуб кој што ги крева тензиите, рече Маричиќ.
Без да даде каков и да е доказ обвини дека зад отворањето на бугарските културни клубови наводно „стојат членови на ВМРО-ДПМНЕ“.
Маричиќ во гостувањето во „Само вистина“, каде дебатираше со поранешниот министер за надворешни работи Никола Поповски, повторно ја обвини опозицијата дека наводно манипулира со тоа дека не сме ги почнале преговорите со ЕУ и ј аобвини дека „свесно лаже“.
Тврдеше и дека со влада предводена од ВМРО-ДПМНЕ земјата никогаш немала да стане членка на НАТО правејќи нелогична и неумесна споредба со тоа кога и Финска и Шведска го менуваат неутралниот статус и очекувале поддршка од Македонија за зачленувањето во Алијансата.
„Многу важно беше да бидеме членка на НАТО, од безбедната страна на границата. Тоа што претходната власт немаше волја не може да се оправда. Секоја влада треба да има цел и мисија, а ако ви е само цел да останете на власт, вие никогаш ништо нема да решите“, рече Маричиќ во обидот да го оправда менувањето на уставното име на земјата и уценувањето со кривични пријави на осумте пратеници од тогашната парламентарна група на ВМРО-ДПМНЕ за поддршка во гласањето.
