Маж со пластична пушка в рака синоќа предизвика паника во Рим и евакуација на главната железничка станица Термини, објавија италијанските медиуми.
– Полицијата на станицата Рим-Термини доби повик за присуство на вооружен маж. Зоната на железничката станица беше евакуирана, соопштија италијанските државни железници.
Медиумите подоцна објавија снимка од безбедносна камера на која е забележан маж со црно палто, сини панталони и бел качкет, кој носи предмет што наликува на пушка, која е свртена надолу. Тој бил пријавен од една патничка во метрото на три станици пред Термини, а потоа и на самата железничка станица. Мажот бил уапсен еден час подоцна со пластична пушка в рака, симнувајќи се од воз во Анани. Брзо потоа железничкиот сообраќај повторно е воспоставен.
Термини е најголемата железничка станица во Италија, во која секојдневно минуваат илјадници патници.