Директорот на Зоолошка градина Скопје, Ѓорѓи Галетановски, по повод вчерашните случувања околу неговото присуство на ракометниот натпревар Македонија- Данска, денеска се огласи со изјава за медиумите.
„Почитувани медиуми, должен сум да ве известам што се случуваше во текот на изминатите два дена. Во текот на вчерашниот ден бев прозван од неколку лажни Твитер профили, а потоа веста за наводно прекршување на Ковид протоколите се прошири и по медиумите, по што бев повикан да дадам изјава во полициската станица Карпош.
Како што изјавив таму, сакам и овде да кажам дека на ракометниот натпревар завчера присуствував како дел на менаџментот на РК Спартак од Кисела Вода, на покана на македонската ракометна федерација.
Бев запишан на списокот пред салата, кој бил предаден до МВР еден ден пред натпреварот, а кога стигнав на врата, уредно бев сместен во салата според сите протоколи. Свесно и одговорно тврдам дека јас лично не прекршив ниту еден протокол и доколку обвинителството пронајде вина во некоја моја постапка, повикувам да постапи според законот“, истакна Ѓорѓи Галетановски.
Пратеникот на СДСМ, Дарко Каевски и градоначалникот општина Кисела Вода, Филип Темелковски, кои покрај Галетановски присуствуваа на мечот за што во петокот по реакциите на јавноста беа повикани во петокот попладнето во полициска станица за А1он изјавија претходно дека добиле покана од Ракометната федерација на Македонија, но генералниот секретар на РФМ се оградува од упатување каква и да е покана.
„Како федерација апсолутно и максимално ги почитуваме сите здравствени протоколи и превентивни мерки. Јас како генерален секретар на РФМ се оградувам од упатување каква било покана“, изјавил Филип Милошоски за А1он.
