Министерот за здравство Фатмир Меџити на претставниците на Асоцијацијата за цистична фиброза денеска им вети дека за најмалку 42 пациенти со оваа болест ќе биде обезбеден лекот „Трикафта“ до крајот на годината.
Асоцијацијата за цистична фиброза се бори лекот да го добијат сите пациенти во државата. Тие одржаа и неколку протести, а критиките за односот на државата кон овие пациенти кулминираше на средината на февруари кога почина пациент со оваа ретка болест во Македонија, чекајќи државата да обезбеди лек.
На денешната средба во Министерството, освен за лекот, се разговарало и за центар во кој ќе се лекуваат овие пациенти, оти досега тие се лекуваат на Детскатата клиника или на Клиниката за пулмологија, каде што имаа проблеми со болнички места.
„Центарот за цистична фиброза се планира да почне во скоро време“, рекоа од Министерството за здравство.
Цистичната фиброза е генетска болест која ја имаат околу 130 луѓе во земјава. Тешко ги напаѓа белите дробови и панкреасот, и напредува како што минуваат годините. Затоа пациентите се млади, а нивниот животен век краток. Но, со лекот „Трикафта“, кој моментално го добиваат 12 пациента, се олеснува болеста и лицата можат да функционираат без проблеми.
