Италијанската премиерка Џорџија Мелони остро ги критикуваше затскриените зделки за највисоките позиции во ЕУ и рече дека е „надреално“ мислењата на европските гласачи да не се земаат предвид, објави Политико.
„Има такви кои тврдат дека граѓаните не се доволно мудри за да донесат одредени одлуки и дека олигархијата е единствената прифатлива форма на демократија, но јас не се согласувам“, рече Мелони додека се обраќаше пред италијанскиот парламент во средата.
Таа зборуваше еден ден откако шест лидери на ЕУ од центристички партии објавија дека Германката Урсула фон дер Лајен, Португалецот Антонио Коста и Естонката Каја Калас треба да ги добијат највисоките позиции во Европската комисија, Европскиот совет и службата за надворешна политика.
Истите имиња беа објавени пред европските избори во јуни. Централнодесничарската Европска народна партија на Фон дер Лејен излезе како голем победник на тие избори, но Европскиот парламент, исто така, се префрли повеќе надесно, при што и групата Европски конзервативци и реформисти (ЕЦР) на Мелони доби места.
Мелони сака таа промена да се одрази во европското одлучување. Во средата, таа рече дека лидерите на ЕУ се чини дека се во искушение „да ја исчистат прашината под тепихот“ наместо да признаат дека многу гласачи се незадоволни од ЕУ.
Таа ја нарече ЕУ „инвазивен бирократски гигант“ и побара Италија да добие улога на еврокомесар што ќе се справи со бирократијата.
Во нејзините коментари во средата, еден ден пред средбата на националните лидери во Брисел, Мелони рече дека е „надреално“ тоа што имињата за највисоките позиции во ЕУ се претставени „без да се земат предвид сигналите од гласачите“.
Мелони истакна дека нејзината група моментално е трета по големина во Европскиот парламент од 720 места, пред либералите.
Во следната Европска комисија, Мелони е насочена кон врвното економско портфолио за Рим, заедно со титулата извршен потпретседател или потпретседател за ЕЦР.
Технички, на фон дер Лајен не ѝ треба поддршка од сите лидери на ЕУ за да биде избрана за уште еден мандат. Таа може да победи со поддршка на мнозинството од нив и без поддршка од италијанскиот премиер.
Еден дипломат на ЕУ рече: „Нема проблем ако треба да го направиме овој договор без Мелони“.
Но, политички, ова е чувствително. Мелони не само што е лидер на третата по големина економија во блокот, туку е и еден од ретките европски лидери кои зајакнаа од европските избори.
Лидерите на ЕУ се состануваат во четврток и петок во Брисел за да разговараат највисоките функции, така што Европскиот парламент може да гласа за втор мандат за Фон дер Лајен во средината на јули.
Во имплицитен напад врз францускиот претседател Емануел Макрон, кој претрпе тежок пораз на изборите во ЕУ, Мелони рече дека „секогаш ќе се бори против“ оние кои се залагаат за „олигархиска и технократска визија за политиката и општеството“, бидејќи тие се обидуваат „јасно да ја задржат моќта дури и од позиции на слабост“.
