Премиерот Христијан Мицкоски денеска ќе учествува на конференција во организација на Институтот за комуникациски студии (ИКС) на тема „Одговорни институции преку зголемена транспарентност и политичка комуникација“.
Како што информираат од Институтот за комуникациски студии, на конференцијата ќе се отвори дебата за унапредување на транспарентноста и отчетноста на јавните институции и политичките актери, преку подобрување на стандардите на политичка комуникација.
-Транспарентноста на институциите и отворената политичка комуникација се клучни за градење доверба помеѓу граѓаните и власта. Кога институциите искрено и јасно ги споделуваат информациите за своите одлуки и активности, тоа овозможува граѓаните да бидат информирани, да учествуваат во дебати и да влијаат на одлуките што ги засегаат, потенцираат од Институтот за комуникациски студии.
Најавени се обраќања на директорката на Институтот – Жанета Трајкоска, премиерот Христијан Мицкоски и на Даниел Филер, вршител на должност во британската Амбасада во Скопје.
-Посебно внимание ќе биде посветено на одговорноста на политичките актери и институциите за искрена и ефективна комуникација со јавноста, особено во чувствителните предизборни и изборни периоди, како и на улогата на медиумите во известувањето за политичките процеси, додаваат од Институтот за комуникациски студии.
Конференцијата се организира во рамките на проектот „Користи факти“, поддржан од Британската амбасада во Скопје.
