-Oд 2018 година или за 6 години потрошија повеќе од 25 милијарди евра. Граѓаните треба да ги прашаме што видоа, што е направено со овие пари, колку километри автопат е направен, освен тоа што беше речиси готово и само го финишираа. Гледате што се случува за автопатот во делот Кичево – Охрид, застој целосен и на отворена сцена имаме политички и криминални калкулантства. Најавија проект, потрошија повеќе од 200 милиони евра, буквално ниту една шајка не заковаа, од ветеното ништо не испорачаа, рече Христијан Мицкоски, претседател на ВМРО-ДПМНЕ за време на денешната посета на Струмица која е во рамки на кампањата „Важно е! Од тебе зависат промените!“.
Мицкоски се осврна дека не е направено ништо ниту во Струмица каде многу ветуваа.
„Се сеќавам на индустриската зона Сачево, појдете да видите дали од најавените десетици инвестиции, дали еден темел е ставен од истите. Ние сме подготвени сериозно да ја трансформираме Македонија“, рече Мицкоски.
Укажа дека партијата има јасен план што да се направи и во овој регион, како и во целата држава, но дека треба прво основните работи да се реализираат затоа што граѓаните имаат потреба од нив. „Прво да го завршиме почнатото, а тоа се многу споменици, како проекти кои се незавршени, тоа да го завршиме и се ќе биде поинаку, граѓаните ќе имаат надеж“, рече тој.