Илегалните пристигнувања на мигранти во Италија преку централната медитеранска рута од Северна Африка се зголемија на 114.300 од јануари до август, што е речиси двојно повеќе од бројот во истиот период во 2022 година, соопшти во четвртокот европската гранична полиција Frontex.
Тунис и Либија се појдовни пристаништа за илјадници мигранти кои го преминуваат Средоземното Море преку централната рута кон Италија.
„Половина од сите илегални мигранти во ЕУ оваа година“ пристигнале преку оваа многу опасна рута, соопшти Европската агенција за гранична и крајбрежна стража.
Мигрантите кои пристигнуваат преку централниот медитерански пат се главно жители на Брегот на Слоновата Коска, Египет и Гвинеја.
„Притисокот на мигрантите на таа рута може да продолжи во наредните месеци, бидејќи шверцерите ја намалуваат цената на транспортот за мигрантите кои заминуваат од Либија и Тунис, со оглед на жестоката конкуренција меѓу криминалните банди“, се вели во соопштението на Frontex.
Повеќе од 2.000 луѓе загинале или исчезнале од почетокот на годината обидувајќи се да го преминат морето, соопшти Меѓународната организација за миграција (IMO).
Италијанската влада во четвртокот објави дека речиси 126.000 мигранти пристигнале на италијанските брегови од почетокот на годината, во однос на 66.000 во истиот период минатата година.
Во јули, Европската унија потпиша партнерство со Тунис за намалување на мигрантскиот притисок од таа земја во замена за помош од стотици милиони евра.
Овој договор е контроверзен затоа што е склучен со власти кои се повеќе се наклонети кон авторитаризам, но и поради извештаите за злоупотреба на мигрантите кои пристигнуваат во Тунис од субсахарска Африка.
Критиките се удвоија во четвртокот кога властите во Тунис одбија да дозволат влез на делегација европски пратеници во земјата.
Лоциран на само 150 километри од тунискиот брег, малиот италијански остров Лампедуза е под посебен напад и во четвртокот беше објавено дека повеќе од 7.000 мигранти пристигнале во изминатите 48 часа.
