![CREATOR: gd-jpeg v1.0 (using IJG JPEG v62), quality = 82](https://i0.wp.com/netpress.com.mk/wp-content/uploads/2024/07/Makedonsko-kulturno-leto-Pustec-Ljutkov.jpg?resize=696%2C464&ssl=1)
Министерот за култура и туризам, Зоран Љутков, вчеравечер во музејот посветен на албанскиот писател со македонско потекло, Стерјо Спасе, во селото Глобочани, Општина Пустец, Р. Албанија, присуствуваше и се обрати на отворањето на 19. издание на фестивалот „Македонско културно лето“.
Во своето обраќање, министерот Љутков истакна дека фестивалот на дело потврдува дека културата и јазикот што го зборуваме се поголеми и позначајни од границите што нè одделуваат.
– Денеска преку уметноста, литературата, музиката и сите други форми на културен израз, ги споделуваме креативноста и талентот на македонските уметници, одржувајќи го континуитетот во развојот и промоцијата на македонската култура меѓу сите жители во овој дел на Преспа. Токму преку културата, преку секоја слика и збор, ги уриваме границите и ги засилуваме врските со нашинците – рече Љутков.
Тој додаде дека е ова уште една потврда за грижата за македонското малцинство во Албанија и за посветеноста на Владата и на Министерството за култура и туризам за негување на македонската култура, идентитет и традиција во овој прекуграничен регион, претворајќи го во значајна дестинација за културен туризам.
![](https://i0.wp.com/kurir.mk/wp-content/uploads/2024/07/Makedonsko-kulturno-leto-Pustec-3-690x460.jpg?resize=690%2C460&ssl=1)
Министерот Љутков изрази благодарност до организаторите – Здружението на Македонците по потекло од Албанија „Сонце“ и Едмонд Сотир, до градоначалникот Колефски, до уметниците и до сите оние, како што рече, што со своето присуство придонесуваат овој фестивал да биде вистинско културно доживување.
![](https://i0.wp.com/kurir.mk/wp-content/uploads/2024/07/Makedonsko-kulturno-leto-Pustec-7-690x460.jpg?resize=690%2C460&ssl=1)
![](https://i0.wp.com/kurir.mk/wp-content/uploads/2024/07/Makedonsko-kulturno-leto-Pustec-5-690x460.jpg?resize=690%2C460&ssl=1)
На отворањето на фестивалот, публиката имаше можност да ги проследи изложбата на дела од академскиот скулптор Синиша Новески и промоцијата на книгата „Македонското традиционално пеење во: Мала Преспа, Гора и Голобрдо“ од авторката Андријана Јаневска.
![](https://i0.wp.com/kurir.mk/wp-content/uploads/2024/07/Makedonsko-kulturno-leto-Pustec-4-690x1035.jpg?resize=690%2C1035&ssl=1)
Во рамките на фестивалот што ќе трае до 6 јуни, публиката ќе може да проследи три театарски претстави и една претстава за деца.
Фестивалот, кој е во организација на Здружението на Македонците по потекло од Албанија „Сонце“, има цел заштита, развој и промоција на македонската култура кај македонскиот народ во Албанија.
![](https://i0.wp.com/kurir.mk/wp-content/uploads/2024/07/Makedonsko-kulturno-leto-Pustec-2-690x460.jpg?resize=690%2C460&ssl=1)