Претседателот на Европскиот совет, Шарл Мишел, во вторникот ја предупреди Украина дека не треба премногу да се надева на брза одлука за почеток на преговорите за пристапување во Европската унија.
Некои земји-членки на Европската унија јасно ставија до знаење дека „би сакале добро да размислат“ пред да донесат одлука за следниот чекор во пристапниот процес со Украина, изјави Мишел за новинарите за време на посетата на Киев.
Мишел рече дека земјите-членки продолжуваат да „работат многу напорно за да изградат заеднички став во Европскиот совет“ пред самитот на ЕУ во декември. Но, тој нагласи дека не треба да се потценуваат „политичките тешкотии“ и додаде дека во исто време ќе треба да се донесат тешки буџетски одлуки.
Не кажа кои земји-членки би можеле да го блокираат почетокот на пристапните преговори со Украина, која со помоаш на ткн колективен Запад се бори против руската инвазија од февруари 2022 година.
Мишел рече и дека некои земји-членки сметаат дека треба да се направи повеќе за да се забрза процесот за земјите од западен Балкан, како што е, на пример, Босна и Херцеговина. На некои од нив им беше ветено пристапување во ЕУ пред повеќе од 20 години, посочи шефот на Еврооскиот совет.
Мишел неодамна изјави дека според него, Украина би можела да биде членка на ЕУ до 2030 година доколку ги спроведе потребните реформи, доколку се бори против корупцијата и ги исполни законските барања.
Европскиот совет, во потег без преседан, го одобри кандидатскиот статус на Украина за членство во ЕУ во јуни 2022 година. Киев сега ја очекува одлуката за формален почеток на пристапните преговори.
